Eis Primeiru Ministru Dr.
Marí Bim Amude Alkatiri hateten katak, bainhira Primeiru Ministru (PM)
Kay Rala Xanana Gusmão rezigna-an, sira nain rua sei tun ba baze hodi
fanu fali veteranus sira atu asumi hikas sira nia prinsípiu ne’ebé kuda
iha tempu rezisténsia hahú tinan 1974 katak liberta patria no liberta
povu.
“Ita koalia momós laiha ema ida iha
Timor veteranus liu ha’u, sé veteranus duni prinsípiu ida, prinsípiu ida
ke 1974 kedas ita asumi libertar a patria libertar o povo, povu la’os
ita veteranus deit, sé ita veteranus deit hanoin dehan ita simu subsídiu
ita nia vida di’ak ona (ita sente) povu liberta ona ne’e sala,” dehan
Alkatiri iha Oecusse Sábadu (8/2).
Tanba ne’e, Alkatiri dehan, veteranus
mak tenki kontinua prosesu ne’e ho nia kbiit ho nia servisu ho nia
patriotismu para kontinua liberta povu.
“Veteranu iha direitu atu simu la’os
simu para atu deskansa, simu hanesan insentivus para atu servisu, balun
kolen no katuas liu ona ne’e oin seluk, mas agora balun 30 anos mós
veteranus, balun 30 anos dehan luta 24 anos ona lahatene halo nusa,”
dehan Alkatiri.
Atu hatuur hikas prinsípiu sira ne’e,
Alkatiri dehan, bainhira PM Xanana rezigna-an sira rua sei tun ba baze
hodi fanu fali veteranu sira.
“Ami nia programa tau iha orsamentu
ona, ami atu tun hamutuk ba baze para atu fanu fila fali veteranu sira
hotu para dehan ita (veteranus) nia misaun seidauk hotu, tanba ne’emak
ami lakohi ukun ona, husik ema seluk ukun para ami atu fanu fila-fali
valores no prinsípiu patriotismu no nasionalismu sira ne’e,” Alkatiri
afirma.
Eis Primeiru Ministru (PM) iha Primeiru
Governu Konstitusionál no aktual Sekretariu Jerál Partidu FRETILIN ne’e
afirma katak, tenki kuda nafatin prinsípiu nasionalismu no patriotismu
iha povu nia leet katak, independénsia ne’e sosa ho ran no ruin. Sé la’e
Alkatiri dehan, loron ruma Timoroan sei sai bainaka iha sira nia rain
rasik.
“Ita rai ki’ik tan, aban bainrua ita sai
penonton, ema seluk mak mai ukun ita nia rain, la presiza sira
(estranjeiru) mai ukun rasik, sira tau tiha ita nia maluk balun iha
ne’eba depois sira mak kaer volante,” Alkatiri hateten.
Tanba ne’e, Alkatiri fundamenta,
bainhira PM Xanana rezigna-an sei laiha krize tanba PM Xanana rezigna-an
atu hametin establidade paz no dezenvolvimentu.
“Uluk ha’u rezigna-an tanba krizi, ha’u
rezigna-an para hapara krize agora establidade, Primeiru Ministru Xanana
Gusmão rezigna-an para hametin tan establidade la’os atu kria krize,”
dehan Alkatiri.info husi :
http://www.jndiario.com/
Komentario : http://www.jndiario.com/
________________________________________________________________________
