Timor Leste iha Progresu

DILI – Iha semana ida ne’e ha’u halo vizita ba Timor-Leste ba dahuluk nian no haree direitamente progresu boot nasaun ne’e halo. Iha deit dekada ida nia laran desde restaurasaun independensia nian, Timor-Leste sai husi konflitu no hetan dadauk benefisiu husi progresu iha tempu dame nia laran.

Desde simu papel lideransa iha grupu “g7+” nian, Timor-Leste fahe dadaun ninia esperiensia ho nasaun foun no frajil sira seluk liu husi “New Deal (Akordu Foun), aprosimasaun hodi serbisu hamutuk ho nasaun frajil sira.

Ohin loron, labarik Timor oan barak tan mak tuur iha eskola, ema sira nebé hetan asesu ba serbisu saude aumenta, no nasaun ne’e nia setor privadu mos komesa buras ona. Buat hirak ne’e no progresu sira seluk hanesan buat ida nebé mak impresionante tebes.

Iha tempu hanesan, luta hasoru mukit seidauk hotu. Maske iha ona progresu boot, mukit no mos dezempregadu sei aas nafatin nebé dadus ofisial ikus hatudu katak kuaze metadu husi populasaun Timor tomak moris iha liña mukit nia okos, liu-liu sira nebé hela iha area rural.

Buat hirak ne’e bele kria konfuzaun uituan. Tanba maske iha krize ekonomia global nia laran, Timor-Leste sei sai nafatin nasaun ida husi nasaun sira nebé ho nivel kresimentu nebé aas iha mundu tomak, ho kresimentu media? porsentu 12 kada tinan durante tinan 5 nia laran, molok tinan 2012.

Maibe hanesan esperiensia iha Timor-Leste hatudu katak, kresimentu nebé mak aas deit sei la kompletu. Hodi bele halakon mukit, ema tomak tenki hetan benefisiu husi kresimentu ne’e.

Saida mak presiza halo hodi lori nasaun ne’e ba oin? Atu garantia katak ema tomak bele hetan benefisiu  husi kresimentu nebé forte, presiza halo asaun ruma. Timor-Leste nia dezafiu iha tinan oin mak, hanusa bele atinji kresimentu nebé sustentavel nebé bele kria kampu traballu, diversifikasaun iha setor oi-oin, no labele depende demais ba iha mina-rai. Solusaun ruma ba dezafiu hirak ne’e mak: Politika fiscal nebé adekuada, medida ruma hodi bele kria serbisu husi setor privadu, politika sosial hodi bele fo benefisiu ba ema nebé mukit, no politika agrikultura.

Investe iha infrastrutura nebé duravel no ho kualidade, importante teb-tebes. Iha tempu badak,  investmentu ne’e sei kria serbisu, no iha tempu mediu no tempu naruk, sei fornese ponte-kais no dalan  nebé diak ba nasaun tomak nebé mak sei liga komunidade sira iha area rural no hadian tan distribuisaun  ba sasan sira no mos serbisu baziku.

Infrastrutura nebé diak sei mos hasae oportunidade ba komersiu  nian iha setor agrikultura, florestal, no mos setor peska, hirak nebé mak liu husi metade populasaun nian halo moris ba. Investimentu nebé orienta ho didiak bele fo impaktu boot hodi bele hamenus mukit no harii prosperidade ba ema tomak.

Buat importante ida hodi hamenus mukit no disigualdadae mak hasae tan rendimentu ba setor tomak.  Ohin loron, porsentu 70 husi forsa traballu nian mak iha serbisu nebé mak metin, konsentradu iha setor sira hanesan agrikultura no negosiu retailer, no so porsentu 29 husi traballador deit mak simu salariu  formal no kampu serbisu barak nebé iha mai husi kontratu ho fundu publiku, iha area konstrusaun, transporte no komunikasaun.

Dezenvolvimentu setor privadu nian ne’e kritiku tebes hodi bele kria kampu serbisu no iha dalan barak hodi bele stimula negosiu kiik no negosiu mediu sira. Klaru, Grupu Banku Mundial nia relatoriu “Doing Business” identifika ona area hirak nebé mak bele hadian hodi bele dudu klima negosiu nian ba oin.

Presiza atu halo prosesu hodi komesa no halo negosiu ne’e fasil hodi nunee bele kria tan kampu serbisu  ba timor oan sira. Dezenvolvimentu nebé fo promesa boot mak estabelesimentu SERVE, rejistrasaun integradu ba negosiu nian. Iha fulan 6 durante nia operasaun, SERVE hamenus tiha prosesu naruk hodi  ba rejista negosiu foun husi mais ou menus loron 118 tuun ba loron 3-5 deit, nebé signifika katak setor  privadu sira iha oportunidade hodi bele poupa osan liu husi millaun 20 dolares.

Karik buat importante liu hotu mak kontinua hodi investe nafatin iha povu Timorense. Hadian kualidade iha edukasaun, saude no nutrisaun, liu-lliu labarik kiik no sira be mukit, no mos vulneravel sira esensial  teb-tebes. Ho ida ne’e laos deit hamenus disigualdade, maibe mos iha impaktu pozitivu ba dezempeñu ekonomia sustentavel.

Maibe, investimentu iha saude no edukasaun laos deit haree ba iha kuantidade, tenki haree mos iha nia  kualidade. Izemplu, laos deit garantia katak labarik sira tuur iha eskola maibe mos tenki garantia katak sira sei tuir nafatin eskola ho diak nebé mak sei prepara sira nia aan hodi bele partisipa iha nasaun nia dezenvolvimentu. Evidensia global husi nasaun foin-sae sira hatudu katak programa transferensia fundu hanesan nebé mak halo iha Timor-Leste: Bolsa da Mae, nebé fó pagamentu osan ba familia mukit ba labarik nia saude no edukasaun iha ona impaktu pozitivu. Inisiativa hirak ne’e bele hasae no haberan tan hodi bele garantia
katak benefisiu hirak ne’e bele too duni ba familia sira nebé menus hetan vantajen. Timor-Leste nia dezafiu ba dezenvolvimentu sira seluk ne’e mesak susar duni. Los duni, ne’e laos buat fasil hodi bele garantia katak benefisu husi kresimentu ekonomia nebé aas bele hetan husi sidadaun tomak.

Buat fundamental ida mak dadaus nebé iha hodi bele fó lideransa sira informasaun nebé klaru no pontual konabá mukit no vulneravel sira iha nasaun tomak hodi bele afeita sira nia desizaun.

Governu, liu husi ajensia estatistika nasional, iha tempu badak sei lansa “Living Standard Survey”, nebé sei ajuda lider sira komprende liu tan situasaun ekonomia iha rai laran tomak. Dadus nebé mak rekolla sei kontribui ba baze evidensia ba investimentu oinsa mak sei iha impaktu boot liu hodi bele hamenus mukit no disigualidade, nunee Governu bele kontinua aloka nasaun nia rekursu ho politika no programa nebé efeitivu. Banku Mundial suporta inisiativa hirak ne’e hanesan parte husi ami nia esforsu hodi kapasita instituisaun governu sira hodi bele fornese serbisu publiku ho diak liu tan no hadian tan protesaun sosial.

Grupu Banku Mundial hanesan Timor-Leste nia parseiru ba tempu naruk nian hodi bele halakon mukit no harii prosperidade ba Timor oan tomak. Buat rua ne’e mak sai hanesan obejtivu instituisaun ne’e nian no hakerek ona iha ami nia Estratejia ba Parseria nian (CPS) nebé aliña ho estratejia governu nian, Planu Estretejiku ba Dezenvolvimentu 20130. Ho parseria nebé forte, hau fiar katak Grupu Banku Mundial bele kontinua fo asistensia ba nasaun ne’e nia aspirasaun hodi bele harii nasaun ida nebé mak prosperu no sosiedade nebé inkluzivu.
info husi : Timoroman.com

Komentar : 
 ____________________________________________________________________

• Tweet

Judul: Timor Leste iha Progresu
Rating: 100% based on 99998 ratings. 5 user reviews.
Ditulis Oleh Nelson Blog 04.42

Artikel Terkait :