Info Timor-Governu Timor Leste (TL) lahakfodak no latauk tékniku ne’ebé mak nasaun viziñu Australia halo ho intensaun atu manan ba kazu Certain Maritime Agrement in The Timor See (CMATS) iha Tribunál Internasional Justisa (TIJ) Den Haag Olanda, maibé Australia labele mehi, tamba Timoroan sira uluk funu kesi kabun mak hodi halo funu to’o manan nia independénsia.
Deputada Maria Adozinda Pires husi bankada FRENTE Mudansa lamentavel tebe-tebes ba lian fuan ne’ebé hato’o husi diplomata Australia nian katak, sei iha konsikuensia ba relasaun ba rai rua entre Australia ho Timor Leste, relasiona ho kazu arbitrajen.
Maibé Parlamentu Nasionál (PN) lafiar katak, relasaun bilaterál TL ho Australia bele kotu.
Nia dehan, Governu TL ho Australia nia relasaun sei la’o nafatin, maibé ameasa ne’ebé Australia halo hasoru Governu TL ne’e hanesan tékniku ida ne’ebé mak sira halo ho intensaun atu manan iha kazu CMATS, maibé ne’e sei prosesu iha tribunál internasionál Justisa iha Den Haag Olanda.
Deputada Maria Adozinda informa katak, tuir lolos Australia labele halo hanesan ne’e ba TL, tanba Australia nasaun ida ne’ebé mais avansadu liu, ne’ebé tuir loloos Australia mak tenki ajuda fali TL.
“Ha’u sente lamentavel tebe-tebes ba hahalok ne’ebé Australia halo hasoru Governu Timor Leste, tanba tuir lolos ne’e sira mak fó ezemplu di’ak mai ita Timor Leste, tanba sira nasaun ida ne’ebé mais avansadu liu”, hatete deputada Maria Adozinda Pires ba Jornalista sira iha PN Kuarta (19/3).
Iha fatin hanesan deputadu Paulino Monteiro husi bankada Partidu Demokratiku (PD) dehan katak, tuir nia haree relasaun Australia-Timor Leste ladun atensaun sa’e oituan iha parte ekonomia liu-liu husi petroleum minarai nian, maibé iha parte seluk la’o di’ak. Nia hatutan katak, sé iha futuru maka desizaun fó rezultadu di’ak ba Timor Leste no vantajen di’ak ba Timor Leste, entaun klaru katak Australia sei haree Timor nervuz duni.
“Tanba fó benefisiu deit mai Timor Leste, maibé ladun fó vantajen ba sira, nune’e hakarak ga lakakohi Australia tenki halo relasaun di’ak ho Timor Leste, tanba ita hotu-hotu iha interese ba minarai ne’e”, nia komenta.
Deputadu Paulino Monteiro esplika katak, liu husi prosesu jurídiku Timor Leste karik sei manan, tanba ne’e Australia haree TL nasaun kiik atu habit liu tan, maibé Timor sei manan iha kazu CMATS konserteza Australia hirus liutan mai TL.
Deputadu Cesar Pilotu husi bankada CNRT hateten katak, Australia labele halo ameasa buat ne’ebé mak presiza rezolve iha Tribunal ne’e presiza duni tesi iha ne’eba. Tabba hari’i tribunal ne’e atu ba haree kazu sira hanesan ne’e, maibé relasaun povu TL ho povu Australia metin nafatin.
Deputadu Cesar hatutan katak, sé Australia hakarak hakotu relasaun bilateral diplomata entre Governu Australia ho TL ne’e sira mak hakarak hapara la’os Timor mak husu hodi hapara, maibé nia (deputadu Pilotu red) fiar katak sei laakontese hanesan ne’e.
“Timoroan sira mós halo funu ne’e kesi kabun la’os Australia mak mai fó han, la’os Australia mak mai fahe fós no la’os Australia mak selu terseira idade sira ne’e, nune’e nia hanoin relasaun Timor Leste ne’e hahú husi Prezidenti Repúblika ba to’o iha povu metin nafatin ho povu Australia”, katak nia. Jndiario
Komentariu :
Judul: Australia Keta Mehi Manan Kazu CMATS
Rating: 100% based on 99998 ratings. 5 user reviews.
Ditulis Oleh 12.37
Rating: 100% based on 99998 ratings. 5 user reviews.
Ditulis Oleh 12.37
