PM. Xanana Konsidera Intelektuais TL Hanesan Estatua

Primeiru Ministru Kay Rala Xanana Gusmão konsidera intelektuais iha Timor Leste (TL) hanesan estatua, tanba nunka konvoka malu hodi tau hanoin hamutuk para diskuti problemas povu no rai ida ne’e nian.

Xanana dehan, bainhira nia ba igreja, nia haree  iha estatua ida hamriik iha vidru laran, estatua ne’e hamnasa hela deit, ema ba adora nia tanba ema ne’e triste, maibé nia hamnasa hela deit.

“Ne’emak ha’u husu ba intelektuais iha Timor laran tomak, liu-liu sira iha Distritu Lospalos, imi ne’e hanesan santu sira, hanesan vidru nia laran ne’e. Favór ida imi halo ezersisiu oituan, bo’ok-an hodi vidru monu tiha, hodi ema bele hetan imi nia oin,” hateten Kay Rala Xanana Gusmão iha nia diskursu iha workshop nasionál kona-ba polítika formasaun ba estrutura pre-deskonsentrasaun ne’ebé hala’o iha Centro Convenções Dili (CCD), Kinta (27/2).

Xefi Governu ne’e hatutan katak, ohin loron intelektuais Timor-oan hotu hanesan santu sira iha vidru nia laran ne’e, ema atu mate dadauk ona mós, sira hamnasa hela deit.

“Ha’u dehan ba matenek no intelektuais katak, imi seidauk moris, ha’u ba tiha ona igreja, iha igreja ne’e iha estatua, ita ba ne’ebá ne’e, ita kontente teb-tebes, bainhira ita atu ba agradese Maromak, ita haree ba iha estatua ida nia sériu hela deit,” Xanana afirma.

Xanana esplika katak, Timor Leste (TL) presiza lideransa matenek ida, atu intelektuais hotu diskuti kona-ba ekonomia ba TL ne’e, oinsa no seguransa ne’e oinsa.

“Ita hotu disktuti to’ok, simu ema seluk nia matenek oituan, la’e ita hein deit ida mak koalia. Tanba ida ne’e mak ha’u moe atu koalia, tanba ha’u atu fó fatin ba imi mak koalia,”tenik Xanana.

Xanana fundamenta katak, diskusaun ida ne’e presiza, tanba futuru nasaun nian ne’e, imi sira intelektuais sira ne’e, tanba ne’e tenki tu’ur hamutuk hodi haree katak, futuru nasaun nian ne’e atu la’o oinsa.

“Teoria hot-hotu serve, maibé teoria ida ne’ebé di’ak liu ne’e, teoria ida ne’ebé ajusta ba realidade Timor Leste nian, atu dehan katak, ida ne’ebé mak atu serve aplika iha rai ida ne’e. Jestór ne’e dehan katak, jestaun ne’e oinsa, jestaun ne’e ho prinsípiu atu dezenvolve rai Timor Leste ne’e, tanba komponente sosiais, poténsiais, ekonómikus no polítikus ne’e oin seluk”, katak Xanana.

Xanana hatutan katak, ohin loron, Timor Leste iha prinsípiu ho valores ne’ebé mundu tomak rekoñese, iha mundu ne’ebé globalizadu no mundu ne’ebé teknolojia permiti rai Timor Leste atu akompaiña fatin hot-hotu nia dezenvolvimentu no nia frakezas.

“Ita Timor Leste nu’udar nasaun foun, iha fulan Maiu ita sei halo tinan 12, ita tenki buka nafatin, oin nusa mak hametin pillares ba ita nia ukun-an ne’e. Tinan rua-tolu ba kotuk, ita mais joven nasaun do mundu,”relata Xanana.

Xanana Sosa Kotu Alkatiri

Iha okaziaun ne’e mós, Primeiru Ministru Kay Rala Xanana Gusmão kestiona konaba prespetiva balun ne’ebé koalia katak, PM Xanana sosa kotu ona Sekretariu Jerál Partidu FRETILIN, Mari Bim Amude Alkatiri, tanba PM Xanana sempre lori tui-tuir Marí Alkatiri, bainhira hala’o vizita ba rai liur no iha rai laran.

“Tanba ne’e mak ema koalia dala barak ona dehan katak, oh Marí Alkatiri ne’e, Xanana sosa kotu tiha ona. Ha’u koñese Marí imi seidauk moris, ami na’in rua amigu bo’ot teb-tebes uluk, maibé nia kuandu iha konfiksaun, konfiksaun, tanba ami mós halo auto reflesaun dehan ladi’ak, ita labele fahe ema sira ne’e,”akresenta PM Xanana liu husi nia diskursu iha workshop nasionál konaba polítika formasaun ba estrutura pre-deskonsentrasaun ne’ebé hala’o iha Centro Convenções Dili, Kinta (27/2).

Xanana hateten katak, nia hamutuk ho Alkatiri, atu dezenvolve rai ida ne’e, tanba ne’e, tenki depende ba Timoroan hotu.

Xanana akresenta katak, ema ida-idak iha nia karakter, ida hirus, ida di’ak, no seluk nune’e, maibé bainhira koñese malu hotu ona hodi dehan katak, tenki hanoin ida deit, Xanana fiar katak, rai ida ne’e sei bele ultra pasa problema ida ne’e.

“Depende ba ita hotu, husik ida-idak nia kna’ar ne’ebé simu dadauk, atu ki’ik ka bo’ot. Tanba ne’e mak iha ne’e ha’u sadik ema hotu, ita servisu tiha ona oituan, ita tauk hafoer-an, ita mak fó valór ba servisu, la’os servisu mak fó valór mai ita,”tenik Xanana.

Xanana dehan, workshop ida ohin (horseik) ne’e, atu koalia konaba problema bo’ot ne’ebé afeta nasaun TL ne’e.

Tanba ne’e Xanana husu ba intelektuais sira atu buka fali loron seluk hodi tu’ur hamutuk fali ho nia atu deskuti problema ida ne’e, kona-ba lideransa sira nia komportamentu ho povu.

“Sé ita buka oportunidade hetan matenek oituan, fó fali ba ita nia rai ne’e, hodi ajuda ita nia povu, oinsa mak itabele ultra pasa dezafiu.  Tanba ita temi dehan katak, lideres, maibé Timor la presiza lideres, Timor agora presiza ba jerasaun foun, presiza lideransa,”katak Xanana.

Timor presiza lideransa ida ne’ebé bele diskuti malu ho ema, maibé diskuti malu ne’e la’os ida hakilar tu’un sa’e, maibé diskuti problemas nasaun ninian, iha ekonomia no iha sira seluk mós.

Tanba ne’e mak, Xanana dehan, nia hakarak doko intelektuais nia matenek ne’e, atu fahe oituan sira nia matenek ne’e ba rai no povu ida ne’e, labele rai deit matenek ne’e iha ida-idak nia kakutak.Jndiario

Komentario :

_______________________________________________________________________

• Tweet

Judul: PM. Xanana Konsidera Intelektuais TL Hanesan Estatua
Rating: 100% based on 99998 ratings. 5 user reviews.
Ditulis Oleh Nelson Blog 20.44

Artikel Terkait :