PR Taur: Kualidade Infraestrutura Iha TL Ladi’ak

Prezidenti Repúblika (PR), Taur Matan Ruak preokupa maka’as kualidade infraestrutura iha Timor-Leste (TL) ne’ebé ladi’ak, tanba ne’e Kinta (27/2), Xefi Estadu realiza meza kabuar ho entidade sira ne’ebé ligadu ba infra-estrutura nian hodi diskuti konaba kualidade infraestrutura liu-liu projetu ne’ebé implementa iha rai ida ne’e.

Iha diskusaun ne’e diskuti liu-liu konaba kualidade projetu tanba dadauk ne’e projetu barak maka laiha kualidade, nune’e liu husi debate ne’e bele hetan solusan ba problemas ne’ebé maka emprezáriu sira hasoru hodi halo kualidade projetu ne’ebé ladi’ak.

Iha diskursu hodi loke meza kabuar ne’e, Xefi Estadu, Taur Matan Ruak hateten katak, durante ne’e ema hotu preokupa ba kualidade projetu ne’ebé maka iha tanba projetu barak maka laiha kualidade.

“Estrada balun ke uluk ha’u sei eskola iha tinan 60 mai 70 maka Português sira halo, ohin nia sei metin. Ita nian halo-halo kotu uluk tiha ona ladi’ak. Husu karik ha’u tanba saida? Ha’u lahatene responde, tanba ne’e konvida ita boot sira iha ne’e i ha’u espera katak ita boot sira bele kontribui para buka hatene tanba saida maka ida ne’e akontese, solusaun saida para ita iha ne’e ba oin bele di’ak liu,”dehan Xefi Estadu, Taur Matan Ruak liu husi nia diskursu wainhira loke meza kabuar iha Palácio Prezidensiál Aitarak Laran Dili.

Xefi Estadu ne’e hateten katak, durante ne’e preokupasaun barak maka mosu iha sosiedade konaba infra-estritura ne’ebé la’o aat lós tanba ne’e Prezidénsia Repúblika liu husi nia Gabinete realiza debate ne’e para bele hetan solusaun no rekomendasaun ba problema ne’e.

Iha fatin hanesan Sekretario Estadu Óbras Públika (SEOP) Luis Rodrigues hato’o mós sobre projetu sira ne’ebé maka hala’o durante ne’e. Nune’e mós planu saida maka governu iha ona hodi hala’o no akompaiña projetu sira iha futuru.

Entretantu Director Ajénsia Dezenvolvimentu Nasionál (ADN), Samuel Marçal afirma katak, durante ne’e iha fallansu barak ne’ebé maka halo emprezáriu ho ADN hakilar malu maka konaba dezeñu tanba projetu barak maka hala’o dezeiñu lakondis ho rai ne’ebé maka iha tanba ne’e maka halo projetu ne’e laiha kualidade.

“Dala barak ita hakilar malu kompañia ho ADN mas ita iha fallansu ida utama (importante-red) maka ne’e, buat ida atu la’o di’ak ne’e dezeiñu ne’e tenki di’ak, dezeiñu tenki kondis ho terrenu, sé lae maka ita dehan katak dezeiñu ita halo iha tinan kotuk ita halo ba Lospalos derepenti tanba urjenti ita tau fali ba iha Suai, rai la hanesan ona, saida maka akontese sei failla-failla iha ne’ebá,”Samuel Mendonça dehan.

Tanba ne’e, Diretór ADN ne’e husu ba emprezáriu sira atu ba oin tenki iha dezeñu ba projetu sira ne’ebé maka kompañia ka emprezáriu sira nia tarjeitu atu hala’o.

Alénde ne’e Diretor ADN ne’e mós husu ba emprezáriu sira atu halo konseitu hafoin hala’o dezeñu inklui mós klasifikasaun ba sasan ne’ebé maka uza nune’e bele hala’o projetu ho kualidade no dura to’o tinan barak.

Nune’e mós Vise Prezidenti Consorsio Nasional Timorense (CNT), Agostinho Gomes esplika katak, konaba asuntu levantamentu no estudu ba rai nian hodi identifika didi’ak maka hala’o konstrusaun projetu sira.

Alénde ne’e nia hateten, presiza mós involvimentu laboratoriun iha prosesu hala’o konstrusaun desde primeiru to’o remata nune’e projetu ne’e hala’o bele la’o ho di’ak.

“Levantamentu ladi’ak, por ezemplu ita tau bronjong ida iha foho nia ain maka levantamentu ladi’ak. Bronjong ita servisu seidauk hotu nia sei muda-an depois maka dada-an hotu ba mota, involvimentu laboratorium la’os deit iha laboratorium maibé iha implementasaun projetu ne’e,”hateten Agostinho Gomes.

Prezidenti Câmara Comércio Industria Timor-Leste (CCI-TL), Júlio Alfaro mós hateten katak, difikuldade barak ne’ebé maka CCI-TL simu konaba emprezáriu sira ne’ebé maka durante ne’e implementa projetu maka governu halo pagamentu tarde.

Júlio Alfaro esplika liu tan katak, durante ne’e emprezáriu sira laiha modal ne’ebé boot sempre halo imprestimu ho emprezáriu sira ne’ebé maka osan boot maibé wainhira hala’o hotu projetu ida governu selu tarde entaun implika ba rendimentu husi projetu ne’ebé maka emprezáriu sira hala’o.

“Dala barak, balun husu des porsentu (10%) fulan ida, balun liu tanba laiha ona osan sira husu to’o vinte porsentu (20%) fulan ida, ne’e todan teb-tebes, ne’e ita la ajuda ona, ne’e ita oho ona.

Kontrolu de kualidade ne’e loos maibé ita mós tenki haree ba aspetu sira seluk ne’ebé impreza sira infrenta hodi hala’o sira nia knar, itabele kumpri responsabilidade, ita mós hakarak hetan osan ruma atu haree ba ita nia familia,”Prezidenti CCI-TL ne’e hateten.

Debate meza kabuar ne’e partisipa husi reprezentante sira iha Parlamentu Nasionál (PN), Sosiedade sivil, enjineiru sira inklui mós emprezárius nasionál iha TL.Jndiario

Komentario : 

 ______________________________________________________________________

• Tweet

Judul: PR Taur: Kualidade Infraestrutura Iha TL Ladi’ak
Rating: 100% based on 99998 ratings. 5 user reviews.
Ditulis Oleh Nelson Blog 20.39

Artikel Terkait :