Aitahan Matak Halai LakonPolicia Nacional de Timor-Leste (PNTL) liu husi Komando Distritu Dili, Kuarta (5/3), sobu sede nasional grupu Conselho Popular Defesa-Republica Democratica de Timor-Leste (CPD-RDTL) iha Balide, Dili.
Operasaun refere kompostu husi Unidade Task Force, Investigasaun, Transito no apoiu husi Unidade Batalhão Ordem Publico (BOP).
Atuasaun PNTL husi komando Distritu Dili ne’e, hahuu husi tuku 10:00 dader Otl, ba serku haleu tiha sede CPD-RDTL Balide, hafoin tama ba koalia ho membru CPD-RDTL sira hodi tur hakmatek labele book a’an no Polisia kontinua sobu airin ne’ebe hasa’e bandeira RDTL no mos sobu sai plaka ne’ebe hakerek naran CPD-RDTL nian.
Iha operasaun ne’e kaptura duni membru CPD-RDTL hamutuk 19 mak iha laran kompostu husi feto nain tolu (estudante) no mane nain sanulu resin nen (16), maibe sira nia portavoz Antonio Aitahan Matak ho Gil Ferdes halai lakon tiha.
Operasaun ne’e mos polisia aruma sai hotu sira nian ropa, sasan sira seluk iha uma laran hanesan kadeira, meja, manu, fahi ho sasan sira seluk tan hanesan katana, samurai, farda militar nian kompostu husi kalsa no kamija prende hotu.
Hafoin halo atuasaun, Marcelino Caldas, Xefi Departamentu Relasaun Publika CPD-RDTL ne’ebé reprezenta portavos CPD-RDTL Aitahan Matak hateten katak, sira respeita desizaun no rezolusaun ne’ebe mak hatun husi governu no Parlamentu Nasional, maibe tuir lolos ne’e nusa la hateten para hasai ho dignu tanba sira laos kriminozu.
“Organizasaun ida ne’e hamriik hanesan autor da restaurasaun laos iha rai laran deit maibe iha ONU ne’eba mos hatene, katak uniku organizasaun ne’ebe eziste iha Timor-Leste ne’e so CPD-RDTL deit la iha tan organizasaun seluk,”hateten Marcelino Caldas.
Marcelino Caladas, ne’ebé sei an hodi sai fali Portavos CPD-RDTL ne’e hatutan, sira halibur malu ne’e oinsa halo koperativas, oinsa bele kuda hare, laos atu halo fali buat seluk.
“Agora ita tama ba faze ba libertasaun do povu maibe ita nia parte ekonomia rai laran ne’e paralizadu oinsa ita nia povu ne’e moris saudavel no diak enkuantu ekonomia la iha ema ida atu orienta, entaun ami intensaun hamriik atu eduka nia povu hodi defende,” hateten Marcelino.
Nia hatutan, sira nia parte kumpri desizaun husi Estadu atu husik fatin ne’e no sira komitmentu ona atu fila fali ba ida-idak nia familia.
Iha fatin hanesan Komandante PNTL Distritu Dili, Superintendenti Xefi, Pedro Belo hateten, sira halo primeiru operasaun ba ezekuta rezolusaun Parlamentu Nasional ne’ebe fo mandatu ba PNTL urjentimente atu halo operasaun ba grupu ilegais ne’ebe mak oras ne’e lao hela rai laran no uza farda militar arbiru.
“Ami hakarak halo operasaun mai uluk iha sentru sede nasional CPD-RDTL nian. ami uluk ida ne’e mak tun ba fali diresaun ou cabang kiik sira iha Dili laran ne’e. atu halo fali atuasaun ka kapturasaun ba lideransa husi grupu ilegais sira ohin temi ne’e hein deit ida ne’e sei iha sergredu hela,”hateten Komandante PNTL Distritu Dili. Komandante PNTL Distritu Dili ne’e haktuir mos katak, membru CPD-RDTL 19 ne’ebe hetan kapturasaun ho prende sira nia sasan ne’e sei engtrega hotu ba sira nia nain no sei tula sira sai hotu husi fatin Balide ne’e hodi ba entrega ba sira nia familia tantu iha Dili laran no mos iha Distritu sira.
“A Não Ser (kecuali) sasan sira hanesan farda militar, samurai ho katana sira ne’e, papan (kuadru) CPD-RDTL no airin bandeira nian ne’e sei prende hotu hatama ba iha auto empresaun hodi hatama hotu ba iha Ministerio Publiku. Sede sira nian ne’e hahuu husi ohin ba oin, Polisia mak sei tau fali markas iha ne’e durante tempu operasaun to’o ne’e remata no entrega ba governu,”hateten Pedo Belo.
Nia hatutan, operasaun ida ne’e laos ba deit CPD-RDTL, maibe ba mos grupu Conselho Revolução Maubere (KRM) ne’ebé lidera husi Paulino Gama ‘Mauk Moruk’ iha Fatuhada, Dili, no mos grupu kiik ilegal sira seluk ne’ebé existe iha kapital Dili no mos fatin sira seluk iha Timor laran tomak.
Maske Antonio Aitahan Matak halai lakon tanba tauk hetan kapturasaun husi PNTL, maibe liu husi telefonika, Antonio Aitahan Matak hateten katak, sede CPD-RDTL hetan estragus no sasan sira uma laran Polisia halo rahun hotu inklui hatun bandeira RDTL iha Sede CPD, Balide, Dili.
Aitahan Matak mos informa katak iha atuasaun ne’e polisia konsege kaptura ninia elementu kuaze nain 30 resin.
Antes ne’e, Grupu CPD-RDTL, liu husi portavos Antonio Aitahan Matak, hateten katak, CPD-RDTL hamriik iha nasaun ida ne’e laos hanesan grupu ilegal, tanba defende konstituisaun RDTL 1975 ne’ebe povu Timor-Leste tomak hamutuk rihun resin ne’ebe mate hodi defende lei ne’e.
“Akuzasaun ne’ebe mak husi Parlamentu Nasional no Governu liu husi Primeiru Ministru ho Ministru Defesa no Seguransa atu kaer, taka ami nia grupu no hatete ami ilegal ne’e, ha’u hanoin la serta no la justu hodi hola desizaun ida que la monu tuir dever no direitu ema ida-idak ninian. Ha’u ema ne’ebe resistensia ha’u tenki defende ha’u nia direitu hodi salva nasaun nia distinu ho obras hafoin defende ha’u nian,”hateten Portavos CPD-RDTL, Antonio Aitahan Matak ba JN- Diário Tersa (04/02), iha Balide, Dili, hodi responde desizaun ne’ebe mak husi PN no governu aprova ona.
Antonio Aitahan Matak afirma tan katak, kona ba farda ne’ebe nia membru balun sei uza hela ne’e mos la lori farda ne’e oho ema ida iha rai ne’e.
“Farda ne’ebe mak ami tau ne’e, se tau fali farda F-FDTL ho PNTL nian ne’ebe mak Estadu resmikan ne’e ami sala, maibe ida ami tau ne’e husi ailaran, resistensia armada tempu ne’ebe mak oho malu, oho bapak Indonesia sira hasai sira nia farda, bapak hasai ami nia maluk sira nia ulun, ne’e mak ami uza sira nia farda ne’e. Se loron-loron ami ba hatais fali farda F-FDTL ho PNTL nian ne’e erro bo’ot ida mai, maibe ami nunka uza farda lori marsa hamutuk ho irmaun Mauk Moruk nia grupu,”hateten Aitahan Matak.Jndiario
Judul: PNTL Sobu Sede CPD-RDTL
Rating: 100% based on 99998 ratings. 5 user reviews.
Ditulis Oleh 20.09
Rating: 100% based on 99998 ratings. 5 user reviews.
Ditulis Oleh 20.09
