InfoTimor-Prezidenti Timor Plaza Avo Jape Chuncu esklarese katak, nia triste ho lia fuan membrus Parlamentu Nasional (PN) nian balun ne’ebé hateten katak, Avo Jape hakarak aluga rai Dolok oan hodi halo rai privadu. “Ha’u la’os ta’a ai parapa sira ne’e, maibé ha’u troka ai bubur tau fali ai hali, tanba ai hali ne’e nia abut bele kaer rai metin, no hamosu mós bee. Dolok oan ne’e tanba ha’u atu halo iha fatin Dolok oan ne’e ba to’o iha Usleo. Maibé ema balun publika fali iha jornal dehan katak, ha’u estraga ai sira ne’e, se mak koalia dehan ha’u estraga ambiente, ha’u sei ba kesar nia mak ne’e,”afirma Avo Jape Chungcu ba jornalista sira iha Timor Plaza Kuarta (19/3).
Nia hatutan katak, semak atu ba estraga ai oan sira ne’e no ba fakar foer iha ne’eba, Avo Jape lahatene, tanba nia mós kuidadu fatin ne’e atu halo buat di’ak ba nasaun no povu ida ne’e.
Avo Jape dehan, kuandu nia halo fatin ne’e prontu, turista husi rai barak mak sei mai iha Timor Leste, no povu mós sei senti buat di’ak ida ne’e.
Rai Dolok oan ba to’o Usleo ne’e, Avo Jape haruka ona tékniku sira dezenha ona saida mak atu halo iha fatin refere. Tanba projetu ne’e pakote ida no bo’ot teb-tebes.
“Agora Parlamentu dehan fali ha’u mak ba estraga fali ai oan sira ne’e, no sira dehan tan, tanba ha’u osan barak ona naran halo sasan tu’un sa’e mos bele deit. Ida ne’e hanesan hafoer ona ha’u nia naran, projetu ida ne’e ha’u gasta osan hira mak ne’e. Ha’u la’os estraga ambiente, maibé ha’u hasai tiha ai bubur sira ne’e hodi kuda fali ai hali, tanba ema hotu hatene katak, ai bubur ne’e labele fó bee no lakaer metin rai ida, maibé ai parapa sira ne’e mós ha’u kuidadu ho di’ak, tanba ai parapa ne’e mós di’ak,”dehan Avo Jape.
Avo Jape subliña katak, sira mós kuda ona nu’u rihun lima resin iha Bebonuk, hodi lori ba kuda fali iha Tasi ibun Dolok oan nian, hodi bele halo ambiente Dolok oan sai furak liu tan.
“Rai Dolok oan ne’ebé mak Prezidenie Timor Plaza ne’e atu loke fatin turismu ba ne’e, husi parte tasi ibun, nia aluga husi Estadu, no husii parte foho nian, nia hola husi komunidade sira. Rai ne’ebé Estadu fó aluga ba Avo Jape ne’e hodi loke halo investementu ba rai ida ne’e, hamutuk 50 hektares, no rai ne’ebé Avo Jape hola husi povu, seiduak hatene hektares hira”, katak nia.
Avo Jape fó atensaun ba ema ne’ebé koalia aat nia ne’e katak, nia halo fatin turismu ne’e ho di’ak, hodi entrega ba Estadu atu Estadu halo saida, Avo Jape sei halo tuir deit.
“Komunidade balun mak ba ta’a ai parapa sira ne’e hodi ba fa’an, maibé Timor Plaza kordana ona ho Floresta hodi halo ona atuasaun ba ema sira ne’ebé estraga ai oan sira ne’e”, nia hateten.
Tanba Avo Jape dehan, nia la’os ema estranjeiru hodi mai bosok tu’un sa’e, to’o ikus ema ne’e fila nonok deit.
“Hanesan iha Tasi Tolu ne’e dehan atu halo andar 25, agora andar ne’e haree iha ne’ebé. Ha’u husu rai ba Estadu no hola rai mós husi povu atu halo sasan, tanba kuandu rai ida fuik ita lahalo buat ida ba, tinan 50 mai, duit ida sei lamosu husi ne’e. Agora ha’u halo Timor Plaza, osan hira mak Estadu selu, ema hira mak servisu iha ne’e,”tenik Avo Jape.
Tanba ne’e, Avo Jape husu ba Timor-oan hotu atu labele koalia aat nia, tanba nia hakarak halo buat ne’ebé di’ak ba povu no nasaun ida ne’e. Avo Jape dehan, maske nia katuas ona, maibé aban bainrua Timor-oan sira sei temi nia naran iha nasaun ida ne’e.
Avo Jape dehan, nia nunka hadau ema nia rai atu halo buat di’ak ba nia-an rasik, maibé nia husu rai ba estadu, maibé rai ne’ebé mak Estadu fó ne’e mos, atu fó saugati deit, maibé Avo Jape aluga.
“Atu ema ida nia rai mos, ha’u koalia didiak ho nia, halo nia kontenti mak foin nia sai hodi ha’u uza nia rai. Ha’u halo uma barak ona ba ema seluk, agora dadauk ne’e mos ha’u sei halo tan uma sanulu tan ba ema, uma mesak didiak deit. Ha’u katuas ona ha’u atu buka tan rai barak halo saida, ha’u nia rai iha Australia ne’eba bo’ot teb-tebes,”relata Avo Jape.
Avo Jape esplika, nia hare Timor-oan hotu hanesan nia oan, tanba nia hakarak aban bai rua mos Timoroan sira temi nia naran iiha rai ida ne’e. Tanba ne’emak Avo Jape hakarak loke fatin turismu ida ne’e, ba ema hot-hotu nia diak.
Avo Jape dehan, nia laos bulak atu tur-tur naran lori osan bar-barak ba tau arbiru iha ne’eba, hodi ema seluk hatete fali nia hanesaan ne’e.
Prezidente Timor Plaza ne’e mos rekuñese katak, sira monta duni avizu ba iha Dolok oan, tanba rai ne’e ra Estadu atu ema labele ba hari tan uma iha fatin refere, atu garante siguru ida ba kompañia ne’ebé atu loke servisu ne’e.
Timor Plaza fo ona kompesasaun ba komunidade uma kain sanulu ne’ebé antes ne’e hela kedas iha ne’eba.
Ba povu ne’ebé agora ne’e hakarak hari tan uma iha fatin refere, kompañia sei la fo tan kompensasaun ba sira, maibé Timor Plaza sei intrega sira ba governu hodi sir abele resolve.
Tanba komunidade sira hatene ona saida mak Estadu tau ona iha ne’eba liu husi avizu sira ne’e, maibé sira sei hakarak ba hari tan uma iha ne’eba. Tanba ne’e kuandu iha futuru mosu tan ema atu rekere katak rai ne’e ninian, nia sei hasoru Estadu, tanba rai ne’e Estadu nian.
Avo Jape hatutan, servisu ne’e agora dadauk hahu ona, komesa husi hamos fatin Dolok oan ne’e, hodi hein dezenhu ne’ebé halo husi Taiwan, Hongkong, Singapore no Australia. sira mos monta ona security iha ne’eba hodi tau matan ba rai refere.
Nia lakohi buat ida kopia ema nian hanesan ba kopia America ka Australia hodi mai tau fali iha Timor Leste. Tanba Avo dehan, Timor Leste ne’e nia rai, tanba ne’e nia hakarak atu halo buat ida husi ninian rasik mak tau iha Timor Leste ne’e.
“Ha’u lakohi bosok, tanba ha’u lakohi kopia ema nian atu mai tau iiha ne’e, ha’u hakarak halo buat ne’ebé diak iha ha’u nia rai, tanba ne’e Estadu tenki hein it oan, tanba ha’u sei istuda hodi haruka ema dezeña halo didiak, tanba ha’u hakarak buat ne’ebé diak. Estadu la fo osan ha’u atu halo buat ne’e, agora ema mai koalia bar-barak, ema seluk mak ne’e, nia hamrik ba ona,”salienta Avo Jape.
Avo mos husu ba Estadu atu fo konfiansa ba nia, tanba nia laos atu uza rai ne’e hodi estraga, maibé atu halo buat diak ba povu no ba nasaun ida ne’e.
Antes ne’e reprezentante povu iha Parlamentu Nasional esklarese katak, Avo Jape tanba iha osan, entaun nia hakarak manda tun sa’e, ida ne’e bele sai problema. Membru parlamentu sira mos hateten katak, rai Dolok oan ne’e Avo Jape hakarak aluga atu halo paria privada.
“Ita respeita señor Jape Chuncu hanesan uniku investor, maibé estraga ai parapa. Ha’u dehan nune’e ai para ne’e presija atu kuda tan iha fatin ne’eba hodi proteje ita nia tasi eventualidade aban bai rua karik akontese tsunami maske Timor Leste laiha, maibé ita presiza halo diak ba area turizmu,”dehan deputadu Fransisco Baranco husi bankada CNRT.
Alende ne’e deputadu Aurelio Freitas husi Bankada Fretilin mos mos dehan, maske Avo Jape iha kapasidade finananseiru sufisiente, maibé iha obstaklu uit oan kona-ba estatutu rai nian la klaru. Tanba ne’e persija resolve tiha mak foin bele kontinua halo konstrusaun ne’e. Jndiario
Komentariu :
Judul: Avo Jape Triste Ho Lia Fuan Membru PN
Rating: 100% based on 99998 ratings. 5 user reviews.
Ditulis Oleh 12.05
Rating: 100% based on 99998 ratings. 5 user reviews.
Ditulis Oleh 12.05
