Info Timor-Eis Primeiru Ministru (PM) iha primeiru Governu Konstitusional, Mari Alkatiri, aktual Seceretario Jeral Partido Frente Revolusionario Timor-Leste Independente (FRETILIN), hateten Australia laiha ona razaun fundamentu atu hasoru Timor-Leste (TL) iha kazu Certain Maritime Agreement of Timor Sea (CMATS), nune’e buka maneiras tun-sae ameasa TL.
Lider partido opozisaun ne’e hateten, nia parte sei fo apoiu tomak ba Governu aktual tamba ne’e nia husu ba Australia atu lalikan fo presaun no ameasa politika hasoru Estadu Timor-Leste ne’ebé maka lori ona kazu CMATS ne’e ba iha Tribunal Internasional Den Haag, Holanda tamba Australia laiha ona razaun.
“Ha’u haree ita abitua tiha ona, se kuandu Australia atu fo presaun mai ha’u, ha’u hamnasa deit, no ha’u kalma no la tauk. Tanba se Australia komesa ameasa ho razaun oin-oin, tanba sira la iha ona razaun, tanba se sira iha razaun sira tauk tanba saida,”eis PM, Mari Alkatiri deklara ba jornalista sira iha Palacio Prezidensial Aitarak Laran Dili, Kuarta (19/03), hafoin hasoru malu ho Prezidente Repúblika, Taur Matan Ruak.
Aktual Sekretarioa Jeral partido FRETILIN hato’o lia hirak ne’e hodi responde deklarasaun politika husi diplomata Australia nian balun ne’ebé maka fo sai iha media Australia nian katak kazu CMATS ne’ebe maka iha ona Tribunal Internasional bele estraga relasaun bilateral entre nasaun rua.
Tuir eis PM, Mari Alkatiri katak, Australia la iha ona razaun fundamentu atu fo presaun ba TL, tanba Timor-Leste nudar nasaun kiik ida hanesan (nehek) no Australia núdar rai bo’ot hanesan (Elefante) loloos tenki kompriende rai kiik lori kazu ne’e ba Tribunal tanba rai bo’ot sira gosta viola rai kiik nia direitu ba mina no gas iha tasi laran.
Alkatiri dehan, nia maka uluk asina akordu ne’e ho governu Australia iha momentu Timor-Leste foin ukun-an ho rekursu ne’ebe limitadu tebes maibe agora nia rasik kontinua apoiu pozisaun governu TL lori kazu ne’e ba Tribunal internasional hodi hetan lia loos ba direitu povu TL nian
“Ha’u apoiu governu lori kazu ne’e ba Tribunal. Biar uluk ha’u maka halo akordu, maibe uluk ha’u kuandu halo akordu ne’e ho situasaun ne’ebé difisil, se Timor oan manan ne’e ha’u sente diak liutan ba ita hotu nia direitu,”Alkatiri, hateten
Tuir eis PM ne’e katak, TL la’os labarik tamba TL desde luta iha tinan 24 nia laran maka hetan nia independensia tamba ne’e TL buka atu respeita malu no lakohi atu ameasa malu tan.
“Se ita kuandu ameasa tanba ita boot, hanesan katuas ida ameasa fali labarik ida ne’e la diak. Australia hatene Timor-Leste la’os labarik, Timor halo luta ba independensia durante tinan 24, e tempu ne’ebé governu Australia ida uluk apoiu Soeharto, tanba ami agora lakohi ameasa ona, maibe ita tenki respeita malu deit,”Mari Alkatiri, apela.
Antes ne’e diplomata Australia nian ne’ebé maka lakohi públika nia identidade, liu husi media ABC Australia nian fo hanoin ba lider TL nian ka na’i-ulun Timor oan katak sei iha konsekuensia ba relasaun rai rua ninian tamba deit prosesu ne’ebé maka TL hahú hala’o ona iha Tribunal Internasional Den Haag nian.
“Na’i-ulun Timor oan sira, hanoin katak arbitrajen no asuntu kona-ba rai-ketan tasi ninian sei la afeta relasaun rai rua nian,”hatete diplomata Australia ne’e.
TL formalmente akuza, iha Tribunál Permanente Arbitrál Haia kona ba espionajen Austrália nian bainhira negosia hela tratadu ida kona ba explorasaun mina no gás iha Tasi Timór.
Ho arbitrajen internasionál, TL hakarak haree tratadu ne’ebé taka tiha ona, ho nune’e maka negosia limitasaun rai-ketan tasi ninian no hasai hotu provetu hotu-hotu husi explorasaun kampo no gás husi Greater Sunrise, ne’ebé ho folin dolar millares milloens.
Liu husi desizaun preleminariu Tribunal Internasional ba Justisa (TIJ) núdar orgaun judisiál importante ida husi Organizasaun Nasoens Unidas (ONU) desidi katak Austrália, tenke kaer metin konteúdu material (dokumentus konfidensial TL nian) ne’ebé sira prende ona, no ema ruma ká ema sira labele uza hodi hein kazu ne’e to’o nia rohan.
TIJ ezije katak Austrália mantein kuidadu nafatin dokumentu no informasaun elektrónika no labele halo kópia ruma to’o hein desizaun Tribunál iha tempu oin.
Tribunál deside mós katak Camberra labele “interfere iha komunikasaun balun entre TL no sira nia advogadu” relasiona ho arbitrajen ne’ebé hakarak tratadu tasi Timór, ho negosiasaun sira oin mai ne’ebé relasiona ho delimitasaun rai ketan tasi ninian ho kualkér prosedimentu seluk ne’ebé envolve ba rai rua ninian, inklui kazu foin lalais ne’e. Jndiario
Komentariu :
Judul: Mari Alkatiri : Australia Laiha Ona Razaun Koalia CMTAS Hasoru TL
Rating: 100% based on 99998 ratings. 5 user reviews.
Ditulis Oleh 12.10
Rating: 100% based on 99998 ratings. 5 user reviews.
Ditulis Oleh 12.10
