Info TImor-Eis Primeiru Ministru, Mari Alkatiri, hatete Timor Leste nudar Estadu indepedensia tamba ne’e ba luta nain sira tomak tenki sai ezemplu hodi respeita Estadu ne’e, hanesan orgaun Prezidente Repúblika, Parlamentu Nasional (PN)), Governo no mos Tribunal. Eis PM Mari Alkatiri hateten kestaun ne’e, hodi husu nafatin ba tribunal atu kumpri nafatin ordem Estadu nian relasiona ho prosesu justisa hasoru Lideransa Konselhu Revolusaun Maubere (KRM), Paulino Gama ‘Mauk Moruk’ ho nia maun Cornelio Gama L-7, kordenador CPD-RDTL Antonio Aitahan Matak, no eis komandante Labarik.
Atual Sekretariu Jeral partidu FRETILIN, Mari Alkatiri hakarak husu ba sidadaun tomak atu hasai esperiensia núdar lisaun ba ema tomak, signifika buka malu ho ideias foun hala’o dialogu para kompriende malu, labele ameasa malu, hatauk malu.
Tuir Mari katak, eis Komandante Brigada Vermella, Paulino Gama “Mauk Moruk” hanesan mós luta nain iha tinan 10 nia laran no nia maun Komandante Cornelio Gama “L7” luta nain durante 24 anos, tamba ne’e ema hotu hanoin sofrementu sira ne’e maibe Estadu harii ona luta nain sira maka tenki sai ezemplu hodi respeita Estadu ida ne’e.
Tamba Estadu laos eis komandante da Luta, Kay Rala Xanana Gusmão actual Primeiru Ministru (PM) nian deit, la’os Prezidente Repúblika (PR) Taur Matan Ruak nian deit no la’os mós nia (Seceretario Jeral partido FRETILIN, Mari Alkatiri nian deit) maibe Estadu ema hotu nian ne’ebé maka ema barak mate hodi harii Estadu ida ne’e, tambe ne’e ema hotu iha dever atu respeita Estadu.
“Timor-Leste Estadu ona, tamba Estadu iha nia direitus no mós obrigasoens, primeiru Estadu tenke defende nia-an. so que pronto, ita haree ema ida hanesan Mauk Moruk uluk mos luta, ninian maun rasik L7 luta to’o fim 24 anus, ita hotu hanoin buat sira ne’e. so que ita hotu luta para harii Estadu, agora ita harii Estadu, ita be luta nain sira ne’e haree Estadu harii ona ita mós tenki uluk fo ejemplu atu respeita Estadu. Estadu ne’e la’os Xanana, la’os Taur Matan Ruak no Estadu ne’e la’os Mari, Estadu ne’e instituisaun ita hotu ninian. Ita luta ema barak mate ne’e tamba atu harii Estadu independente ida,”eis PM, Mari Alkatiri actual Secretario Jeral partido istoriku FRETILIN hateten ba jornalista sira iha Palacio Prezidensial Aitarak Laran Dili, Kuarta (19/03), hafoin hasoru malu ho Prezidente Repúblika, Taur Matan Ruak.
Lider partido istoriku ne’e haforsa tan katak husi luta durante tinan 24 hodi mate, ran hodi sosa hodi harii Estadu indepedensia ida no iha konstituisaun rasik, depois orgaun Estadu nian hanesan reprezentante Parlamentu Nasional povu maka hili, governu forma husi parlamentu nasional no Prezidente Repúblika hili husi povu tamba ne’e tenki respeita Estadu ho orgaun soberania sira ne’ebé maka iha.
“Se ita la respeita ida ne’e, entaun uluk ita luta ne’e halo saida? Ne’e maka ha’u hatete se Mauk Moruk hanesan sidadaun nia iha direitu atu defende nia-an, enkuantu nia seidauk kondenadu, ba ha’u. lei dehan ona Inusensia, tamba núdar sidadaun ida livre ho direitu tomak para defende-an,”Mari Alkatiri, dehan.
Eis Primeiru Ministru iha primeiru governu konstitusional ne’e mós lakohi iha tan konspirasaun politika hodi hamosu krize tamba iha tinan 2006 akontese ona hodi haterus povu, tamba ne’e krize 2006 sai hanesan lisaun boot hodi labele akontese tan hodi halo terus povu.
Kona ba prosesu justisa ba lider grupo illegal hanesan grupo Konselhu Revolusaun Maubere (KRM), ne’ebé lidera husi Mauk Moruk no Conslhu Popular Demokratiku Repúblika Demokratiku Timor-Leste (CPD-RDTL) ne’ebé lidera husi Aitahan Matak inklui Komandante labarik no L7 no membru CPD balun, Mari Alkatiri husu diak liu lideres politikus lalika halo komentariu tamba prosesu ne’e kompetensia justisa nian.
Iha fatin hanesan Xefe Estadu FALINTIL Forsa Defesa Timor Leste (F-FDTL), Brigadeiru Jeneral, Filomeno Paixão, hafoin hasoru malu ho Xefe Estadu, Taur Matan Ruak haktuir katak Xefe Estadu apoiu prosesu justisa hasoru problema ne’ebé maka la’o dadaun.
“Kazu Mauk Moruk, Aitahan Matak, katuas L7 no Labarik, pozisaun Prezidente nian tantu halo tuir buat ne’ebé maka agora la’o. Xefe Estadu apoiu buat ne’ebé maka governu hala’o, tamba halo tuir lei,”Brigadeiru Jeneral F-FDTL, Filomeno Paixão hatete ba jornalista sira iha Palasio Prezidensial Nicolau Lobato Bairo-Pite, Dili.
Komandante Supremu Forsa Armada iha okaziaun ne’e husu ba forsa armada ho seguransa nasional hodi atua no fo apoiu ba malu nafatin tuir profesionalidade no rasionalidade, tamba lideransa organizasaun ilegais hirak ne’e núdar mós sidadaun Timor oan tamba ne’e presiza buka malu nafatin hodi resolve ho pasivu.
Relasiona ho tenente koronel, Amico ne’ebe fo apoiu tula Mauk Moruk ba iha Prokuradoria Jeral Repúblika (PJR) edificio Ministeriu Públiku hetan ona chamada atensaun ba dala ikus husi instituisaun F-FDTL.
“Ba Coronel, Amico, Ami fo advertensia, ami hateten ne’e primeira no ultima-vez,”Paixão afirma.
Brigadeiru Jeneral ne’e haforsa tan katak oras ne’e dadauk desizaun politika iha ona atu F-FDTL iha segunda liña hodi fo apoio ba Polisia Nasional Timor-Leste (PNTL) para parte polisia bele hala’o nia servisu hodi negosia no koopera ho membru grupo illegal sira atu intrega farda para ida-idak fila ba sosiedade hodi hala’o servisu lor-loron nian.
Tamba ne’e instituisaun F-FDTL oras ne’e dadauk fo apoiu ba instituisaun PNTL hala’o operasaun iha Lalulai, Sub-Distritu Laga, Distritu Baucau.
“Oras ne’e sira iha terrenu ami forma ekipa konjuntu, klaru ita nia forsa la’os atu hanesan atua ba inimigu mos. Ita hatene de outruladu ainda não inimigu, mas ami nia suporta ba polisia mas suporta ida mais para desuajaun, se iha operasaun maka sira kontra tebes estadu, entaun estadu tenke empoen hanesan estadu,”Brigadeiru ne’e hateten.
Oras ne’e dadaun kordenador KRM, Mauk Moruk ho eis komandante Labarik detein hela iha Prizaun Bekora nu’udar identidade preventiva hafoin prosesu final ba kazu refere. Ba eis deputadu Cornelio Gama L7 no Antonio Aitahan Matak hetan Termu Identidade Rezidensia (TIR) husi Tribunal Distrital Dili. Jndiario
Komentariu :
Judul: Luta Nain Tenki Sai Ezemplu Respeita Estadu
Rating: 100% based on 99998 ratings. 5 user reviews.
Ditulis Oleh 12.31
Rating: 100% based on 99998 ratings. 5 user reviews.
Ditulis Oleh 12.31
