Info Timor-Lider Konsellu Revolusaun Maubere (KRM)
ne’ebé hanesan eis Komandante Brigada Vermelha, Paulino Gama ‘Mauk
Moruk’ horseik entrega-an ba Polisia Nasional Timor-Leste (PNTL) hodi ba
presta deklarasaun tuir despasu ne’ebé mak hatun husi Ministériu
Públiku (MP).
Mauk Moruk entrega-an tanba atu evita violensia, krime no disturbusaun ne’ebé mak ema hotu lahanoin ne’e bele akontese.
Antes entrega an, ekipa husi Polisia
halo negosiasaun ho Mauk Moruk durante oras lima nia laran, husi tuku
13:00 to’o 17:00 Otl. Prosesu negosiasaun ne’e lori tempu kleur tanba
hein Mauk Moruk nia advogadu Paulo Remedios.
Mesmu iha prosesu negosiasaun ne’e
hamosu dezintendimentu oituan, maibé to’o ikus Mauk Moruk kopera duni
hodi hakat sai no sa’e kareta Polisia nian ho matríkula, 03-643 G TLS,
hodi ba iha Estasaun PNTL Distritu Dili.
Molok hit ain ba kareta laran, Mauk
Moruk hakat sai portaun nia rezidénsia, iha Fatuhada ne’e komu liman
hodi foti sa’e VIVA. Mauk Moruk hakat sai mai, akompaña husi nia maun
Cornelio Gama alias L-7 hamutuk ho nia advogadu privadu Pedro Aparício
no Paulo Remedios inklui advogado privadu seluk iha Sede Konsellu
Revolusaun Maubere (KRM) ninian.
Iha entrevista, Cornelio Gama L-7
afirma, Mauk Moruk entrega-an ba PNTL bazeia ba despaisu ne’ebé mak
hasai husi MP, iha dialogu ne’e la’os atu kaptura, maibé atu husu Mauk
Moruk ba presta deklarasaun iha PNTL.
“Ami lakohi halo problema, ami lakohi
halo konflitu violénsia tanba ita nia povu terus liu ona, terus tinan
sanulu resin ona, ne’ebé Mauk ho ha’u no governu ami sei rezolve, ne’ebé
ami hakarak ba mak ne’e obriga karik Dili ne’e rahun tiha ona,” dehan
L-7 ba Jornalista sira iha Sede Konsellu Revolusaun Maubere (KRM),
Fatuhada Dili Kinta (13/03).
L-7 hatutan, ne’e ho hakarak mak
entrega-an ba polisia, sé obriga deit karik ne’e Dili rahun no ahi sa’e
tiha ona, mas Timor-Leste nasaun demokrátiku ne’ebé sira hakarak mak
liafuan ida deit mak Unidade.
“Terus ba nasaun ne’e, sé mak terus, ita
sira ne’e mak terus ne’ebé ha’u dehan labele estraga nasaun, uluk husu
diálogu sira lakohi, depois halo buat barak hanesan halo operasaun,
parlamentu sira hasai desizaun, iha desizaun ne’e dehan atu halo krime
no violénsia, ne’ebé krime no violénsia mosu tiha ona atu estraga
estabilidade, F-FDTL no PNTL, PNTL lasala, F-FDTL lasala buat sira ne’e
mosu ona aban bainrua mak ita tur hamutuk husu ba sira ukun na’in tanba
sa mak sira halo buat sira hanesan ne’e,” haktuir L-7 ho hirus.
Hafoin Mauk Moruk entrega-an, PNTL
akompaiña kedas ba iha Estasaun PNTL Distritu Dili, hodi halo prosesu
interogatóriu, molok ba prosesu ba tribunál.
Durante oras lima nia laran ne’e polisia
taka dalan husi parte Oeste hahú iha Kuartel Jenerál F-FDTL Fatuhada
to’o Timor Plaza no parte Leste to’o Kampung Alor.
Antes ne’e Parlamentu Nasional aprova
rezulusaun numeru 5/ 2014, konteodu husi rezulusaun ne’e atu taka grupu
ilegal hanesan Konsellu Popular Defeza- Republika Demokratika de Timor
Leste (CPD-RDTL) no Konsellu Revolusaun Maubere (KRM) inklui rekolha
farda militar no atributu ne’ebé organizasaun ne’e uza.
Iha rezulusaun ne’e, orgaun
implementador sira sei uza dalan negosiasaun atu ba hasoru, maibé se
kuandu sira hasoru ho kroat maka sei haforsa rezulusaun ne’e rasik hodi
implimenta mandatu kapturasaun husi Ministériu Públiku.
Entretantu tuir observasaun Jornalista
Jornal ne’e iha terrenu nota katak, prosesu intorogatóriu ba Mauk Moruk,
hahú iha tuku 18:00-22:30 Otl, maibé seidauk remata.’
Iha prosesu intorogatóriu ba Mauk Moruk,
ne’e kontinua akompaiña husi nia maun L-7, advogadu sira hamutuk ho
familias Mauk Moruk nian balun ne’ebé iha Dili.Jndiario
Komentario :
Judul: Mauk Moruk Entrega-An Ba Polisia
Rating: 100% based on 99998 ratings. 5 user reviews.
Ditulis Oleh 03.36
Rating: 100% based on 99998 ratings. 5 user reviews.
Ditulis Oleh 03.36
