Parlamentu Nasionál (PN) Segunda (3/3)
aprova projetu rezolusaun No 14, atu fó autorizasaun ba Polisia Nasional
Timor Leste (PNTL) no Falintil Forsa Defeza Timor Leste (F-FDTL), atu
halo kapturasaun ba grupu fardadu militares ne’ebé lidera husi eis
Komandante Brigada Vermelha Paulino Gama ‘Mauk Moruk’ ho naran Konsellu
Revolusaun Maubere (KRM) no Conselho Popular Demokratiku Repúblika
Demokratika de Timor Leste (CPD-RDTL).
Projetu rezolusaun ne’e aprova ho unanimidade ho rezultadu votasaun a favor 63, kontra 0 abstensaun 0.
Hafoin aprovasaun rezolusaun ne’e,
Prezidenti Parlamentu Nasionál (PN) Vicente da Silva Guterres hateten
katak, grupu ne’e konidera grupu ilegál ne’ebé iha tentativa
instabilidade no ameasa ba estadu de direitu demokratiku.
“Ne’ebé tuir lei no demokrasia soberanu
independenti no unitúriu ida ne’ebé hatur iha povu nia vontade no iha
respeitu ba ema nia dignidade ne’ebé sidadaun hotu-hotu iha liberdade
luan ba espresaun no informasaun, liberdade imprensa ba reuniaun no
manifestasaun ba asosiasaun no ba partisipasaun polítika no mós sidadaun
hotu-hotu hanesan iha lei nia oin iha direitu no dever hanesan”,
hateten Vicente Guterres.
Nia dehan, Parlamentu Nasionál (PN) ikus
liu ne’e akompaiña ho preokupasaun movimentasaun grupu ilegál sira nian
ne’ebé hanaran nia-an rasik Konsellu Revolusaun Maubere (KRM) no
Consellu Demokrátiku Popular de Timor Leste (CPD-RDTL) ho sira nian
ejijensia liu husi média husu ba Prezidenti Repúblika (PR) Taur Matan
Ruak atu halo suspende Konstituisaun da Repúblika, demiti Governu RDTL
no disolve Parlamentu Nasionál (PN).
Vicente Guterres konsidera katak, grupu
ilegál sira ne’e no ema ne’ebé tuir sira hola ejijensia oin-oin ho
natureza polítika, maibé ho mós ameasa ba medidas konkretas kontra
órgaun soberanu RDTL nian, sé wainhira Prezidenti da Repúblika la halo
tuir grupu sira ne’e ninia ejijénsia.
“Ameasa sira ne’e reprezenta koasaun ho
transforma konstitusionais no influensia krime no alterasaun ba estadu
tuir lei ne’ebé preve no deskreve iha artigu 202 iha Kódigu Penal nian.
Nune’e mós hola konsiderasaun katak, iha sira nia manobra subversivas
hotu, sira uza prátika militar oi-oin inklui formatura desfile
konsentrasaun no mós treinu no sira bai-bain uza farda militar ne’ebé
violasaun klara ba artigu 43, 3 no 146 Konstituisaun nian no mós régras
selu-seluk ne’ebé vigora dadaun, liu-liu preve iha lei orgánika F-FDTL
nian ne’ebé aprova iha dekretu Lei No 7/2004 iha dia 5 de Maiu no iha
Kódigu Penal.
Xefi Órgaun Lejislativu ne’e akresenta
katak, grupu ilegál iha objetivu atu halo krime, nune’e PN konsidera
asosiasaun kriminozu nian katak, lei bandu hamosu agrupamentus militares
no ida ne’e konsidera nu’udar krime uzupasaun funsaun no katak, ameasa
halo suversaun ba orden konstitusionál, konstitui krime kontra seguransa
estadu nian ne’ebé bele hetan kastigu todan iha prizaun konforme
dispozisaun iha Kódigu Penal Timor Leste (TL), artigu 188, 194, 195 no
202.
Vicente Guterres akresenta katak, PN
hola konsiderasaun katak, sosiedade organizada ida labele aseita duni
ezisténsia agrupamentus ho tipu militar hanesan ne’e ne’ebé ameasa ba
órgaun soberanu demokratikamente eleitus ne’ebé kontra lei repúblika
nian nune’e PN desidi tuir artigu 92 Konstituisaun da Repúblika nian.
Vicente Guterres akresenta katak, PN
lamenta no kondena maka’as ameasa ba tentadu kontra órgaun soberania
subversaun orden demokrátika nian ne’ebé sira halo. Tanba ne’e, husu ba
grupu sira ne’e no ba ema ne’ebé tuir sira atu hapara kedas hahalok
kontra lei ne’ebé hamosu sentimentu no seguransa iha populasaun sira nia
let.
Xefi órgaun Lejislativu ne’e ejiji ba
órgaun ho instituisaun repúblika liu-liu Governu, Ministériu Públiku
(MP) no PNTL tuir ida-idak nia kompeténsia respetiva atu hola medidas
urjente para situasaun seguransa no povu bele hakmatek.
“Apela ba populasaun no ba sidadaun sira
iha ita nia patria doben tomak atu kontinua hakmatek nafatin iha dame
nia laran, iha sira nia moris lor-loron no iha sira nia servisu hodi
hari’i vida di’ak liu ba sira nia familia no atu hala’o ba oin no
konstrusaun ba Timor Leste (TL) dezenvolvidu no demokratiku liu ba
bei-beik”, katak Vicente Guterres.
PN Lamenta
Iha okaziaun ne’e, reprezentante povu
iha Uma Fukun Parlamentu mós hato’o sira nia lamentasoens, grupu KRM ho
nia ejijénsia ne’ebé ejiji PM Xanana Gusmão rezigna-an lalais, hodi fó
fatin fali ba KRM atu kaer Governu durante fulan 6 to’o tinan ida.
Xefi Bankada Partidu Demokrátiku (PD)
deputada Maria Lourdes Bessa fó sai iha deklarasaun polítika konsidera
katak, KRM hasai deklarasaun polítika ho karakter insitamentu ba
violénsia no halo ameasa direta katak, Primeiru Ministru (PM) Kay Rala
Xanana Gusmão la rezigna-an lalais no la halo disolusaun ba Governu maka
KRM atu hatun V Governu Konstitusional ho sira nia forsa rasik.
“Iha loron hanesan KRM ida ne’e hasa’i
tan ameasa hodi dehan”, hau (Mauk Moruk, red) nia alin Polisia sira,
liu-liu ba Komandante Polisia Nasionál Timor Leste (PNTL), Komisáriu
Longuinhos Monteiro, keta rona demais Vise Primeiru Ministru (VSPM) ba
asuntu social Fernando ‘Lasama’ de Araújo, se la’e loron ida rai lakan
tarutu iha Dili laran, ita nia ulun fatuk haksoit hotu”, Lourde Bessa
lembra hikas.
Xefi bankada PD ne’e hatutan, Repúblika
Demokratika Timor Leste (RDTL), nu’udar estadu de direitu demokratiku,
soberanu, independenti no unitáriu, bazeia ba vontade popular no
respeita dignidade ema, nu’udar humana, hanesan haktuir iha artigu 1 no 2
Konstituisaun RDTL.
“Tanba ida ne’e mak konstituisaun RDTL
Artigu 30, 40, 42, 43, 46 no 48 mós fo tan direitu, liberdade no
garantia pesoais, ba Timoroan hotu-hotu, hodi goza liberdade iha
espresaun ho informasaun, liberdade iha imprensa no iha reuniaun ho
manifestasaun, liberdade iha asosiasaun ho partisipasaun polítika. Ho
artigu hirak ne’e mak bankada PD konklui katak, estadu de direitu
demokratiku signifika katak, Konstituisaun mak difini polítika
fundamental, prinsípiu polítikus no estabelese estrutura, prosedimentu,
poderes ho direitus, órgaun soberanu nasaun ida ne’e nian, inkluindu
Parlamentu Nasionál (PN) no Governu, nune’e mós, garante direitus ho
deveres sidadaun sira hotu nian”, nia deklara.
Ho ida ne’e Lourdes Bessa deklara,
bankada PD kondena maka’as grupu KRM lideradu husi Sr. Mauk Moruk,
ne’ebé mosu ho nia ejijensia inkonstitusionál atu halo suspensaun
Konstituisaun RDTL nu’udar aktu ida hodi sobu, altera no subverte estadu
de direitu no demokrátiku ne’ebé konstitusionalmente estabelesidu tiha
ona”, hateten Lourdes Bessa.
Tanba ne’e Lourde Bessa hateten, bankada
PD fó apoiu máximu ba V Governu Konstitusionál atu taka permanente
organizasaun ilegál sira ne’ebé mosu ho karakter paramilitar radikalizmu
la simu Konstituisaun RDTL lei no orden husi estadu soberanu ida ne’e.
Iha fatin hanesan Xefi bankada Partidu
FRENTE Mudança deputada Bemvinda Catarina preokupa ba situasaun agora
dadauk ne’e no nia rezeita total ba grupu KRM tanba sira ne’e grupu
ilegál.
Xefi bankada FRENTE Mudança ne’e lamenta
tebe-tebes ba grupu KRM ne’ebé forma hodi hatais farda militar ne’e iha
sub distritu Laga distritu Baucau ne’e katak, ró ne’ebé para iha Tasi
laran ka tasi ibun ne’e armas iha laran nakonu iha laran.
Ho azitasaun propaganda oi-oin iha
nasaun TL ne’e, bankada FRENTE Mudança husu ba PNTL no F-FDTL
urjentemente atu halo atuasaun ba grupu ilegál KRM ne’ebé lidera husi
Mauk Moruk.
Entretantu deputadu Francisco Miranda
Branco husi bankada Partidu FRETILIN dehan, Mauk Moruk ne’e nia hakat
liu ba tasi sorin iha tinan barak nia laran hodi bele haluha povu TL,
tanba ne’e laiha zero toleránsia ba nia hodi hakat liu deit.
Deputadu husi opozisaun ne’e hatutan,
agora urjentemente Estadu ho Governu tenki hamutuk hodi rezolve problema
ne’e tanba ne’e tempu to’o ona labele husik nia atu hakat liu deit.
Deputadu Felisberto Monteiro lamenta
katak, labele tolera ba grupu ilegál sira hanesan ne’e, tanba povu TL
terus liu ona durante iha tinan 24 nia laran.
“Afinal ita mak kontra fila-fali ba
nasaun ida ne’e Sr. Mauk Moruk ba toba iha Olanda hodi fila mai forma
fali grupu KRM hodi hasoru inimigu sé mak ne’e”, nia dehan. jndirario
Komentario :
_______________________________________________________________________
Judul: PN Foun PN Aprova Rezolusaun, Kaptura Mauk Moruk
Rating: 100% based on 99998 ratings. 5 user reviews.
Ditulis Oleh 02.36
Rating: 100% based on 99998 ratings. 5 user reviews.
Ditulis Oleh 02.36
