Posibilidade Boot PM Xanana Larezigna-an

Nelson: Pontu Hat Mak Presiza Konsidera

Maske Primeiru Ministru (PM) Kay Rala Xanana Gusmão fila-fila ona deklara abertamente ba públiku konaba ninia rezignasaun ne’ebé atu akontese, entre meiadu 2014 ou 2015.

Maibé ikus-ikus ne’e mosu fali informasaun husi ofisiál balun iha Gabinete Governu nian hateten katak, iha posibilidade boot PM Xanana larezigna-an, tanba Timor Leste (TL) nasaun foun ne’ebé presiza lider hanesan Xanana atu haboot liu tan TL nia naran iha mundu internasionál.

Maske nune’e maibé remodelasaun Governu ne’ebé mak PM planeia ona kontinua akontese.

Nune’e mós fonte konfirmadu ne’e informa katak, wainhira nasaun viziñu sira rona konaba PM Xanana nia rezignasaun, lideres nasaun viziñu sira mós sente katak, la’os atu tau kanuru tohar iha problema TL nian, maibé sira sente elojia ho desizaun PM Xanana, tanba konsidera foin akontese primeiru iha mundu PM husu atu rezigna-an.

Maske sira elojia desizaun PM Xanana, maibé lideres nasaun viziñu sira ne’e sujere ba PM Xanana atu labele rezigna-an lai, tanba TL nasaun ki’ik no foun ne’ebé presiza nafatin lider rezisténsia hanesan Xanana Gusmão atu promove beibeik TL nia naran iha mundu internasionál.

Fonte informasaun ne’e hatutan tan katak, nasaun TL presiza nafatin lider hanesan Xanana atu hala’o dezenvolvimentu hodi hadia povu nia moris ne’ebé di’ak liu.

Entretantu Sekretariu Ezekutivu Brigada Negra/Brigada Transformasaun Sidadania (BN/BRITAS), Nelson ‘Maotula’ Correia hateten katak, asuntu konaba rezignasaun PM Xanana ne’e iha pontu hat mak presiza tau iha konsiderasaun.

“Primeiru ita konsidera katak, ita iha Estadu frajil. Katak foin tinan rua mak ita deklara ‘Adeus Konflitu Bemvindo Dezenvolvimentu’. Iha faze ida ne’e ita foin rekoopera ka fortalese hotu instituisaun ne’ebé mak frajil atu sai duru ho mekanismu dezempeñamentu servisu ho di’ak. Segundu, ita mós tenke respeita povu nia desizaun. Katak ita iha mekanismu própriu ne’ebé tinan lima-lima ita halo liu husi eleisaun, ita aprezenta ita nian programa, aprezenta ita nia intensaun liu husi partidu i povu vota konfiansa ba ita nia programas no ita nia figuras. Entaun kauza sira ne’e povu sei nafatin fó fiar ba maun boot atu ninia mandatu iha segundu periodu ne’e to’o remata iha 2017. Terseiru sé karik iha kondisaun balun mak lapermite ba maun boot atu kontinua pasta Primeiru Ministru ne’e, entaun primeiru pasu ne’ebé mak ita tenke halo mak konvoka diálogu nasionál ho komponente hotu-hotu. Tanba desizaun rezignasaun ne’e la’os afeta deit ba maun boot, maibé afeta liu-liu ba sosiedade tomak. Kuartu, buat ida atu troka lider ne’e tenke liu husi tratamentu natureza, labele mekanika. Tanba buat ida mekanik ne’e ladi’ak. Ne’ebé sé deit mak wainhira povu fó fiar nia sei ba”, hateten Nelson ‘Maotula’ Correia ba Jornal Nacional Diário foin lalais ne’e iha Kafé Brazil Dili, wainhira husu ninia komentáriu konaba posibilidade Xefi Governu Xanana Gusmão larezigna-an iha tempu badak.

Nelson Maotula akresenta katak, sé deit mak jerasaun foun, no povu iha fiar no fó lejitimidade mak sei hakat duni ba pozisaun PM nian.

“Jerasaun foun hatudu iha dedikasaun iha pasadu, prezente no futuru no nia iha lejitimidade rua. Ida nia iha lejitimidade polítika sosiál, katak ema sira ne’e hadomi nia no fiar nia, tanba nia hahalok ne’ebé nia sai lideransa halo di’ak. Lejitimidade ida seluk mak jestór no birokrata. Tanba nasaun ne’e la’os halo ho tradisionál no monarkia, mas nasaun ida ne’e halo ho sistema ida modernu. Entaun presiza ema sira ne’ebé mak iha jestasaun ida ne’ebé mak di’ak. Ne’eduni jerasaun foun sira presiza priense kuadru rua ne’e”, katak Nelosn Maotula.

Sekretariu Ezekutivu BN/BRITAS ne’e fundamenta katak, jerasaun tuan sira tenke sai sentru ida ne’ebé halo transformasaun karateristika, re-evaluasaun ba jerasaun foun ho periodu tranzisionál to’o iha kalendáriu nasionál eleisaun nian, mak depois lideransa tuan sira ne’e bele aposta fali ninia kandidatura husi jerasaun foun.

“Buat boot sira ne’e ita bele la’o maibé buat ki’ik sira ne’e ita tenke iha transformasaun mentalidade, karakter ida ne’e mak ita presiza. Karakter nasionalista, karakter patriotismu, karakter responsabildiade. Tanba problema pasadu ne’ebé mak to’o oras ne’e seidauk rezolve ne’e sé mak atu responsabiliza”, katak Nelson Maotula.

Husi sorin seluk, membru Parlamentu Nasionál (PN) husi bankada CNRT, Natalino dos Santos akresenta katak, PM ne’e lider karismatika, lider nasionál no aman ba nasaun ida. Tanba ne’e desizaun ne’ebé mak sai ona iha públiku ne’e, PM rasik mak foti.

“Ne’ebé Xanana kuandu tafui ona nia kabén ba rai nia sei lalambe. A não ser iha situasaun oin seluk. Mas desizaun ne’ebé nia foti, entaun ha’u fiar katak, nia iha responsabilidade tomak ba rai ida ne’e”, hateten Natalino dos Santos.

Reprezentante povu husi bankada CNRT ne’e hatutan tan katak, isu ne’ebé mak fó sai tan fali konaba posibilidade atu larezigna-an ne’e, atu halo espekulasaun ka konfuzaun deit públiku, para kria debates konaba PM nia rezignasaun.

Deputadu Natalino akresenta katak, ambiente iha nivel intelektuais, estudantes no públiku sira, durante ne’e nunka iha ida mak preokupa no kria diálogu ka debates konaba impaktu ka vantaejn no dezvantajen husi rezignasaun PM Xanana.

Maibé deputadu Natalino fundamenta katak, mandatu ne’ebé mak Partidu fó ba Xanana nu’udar Prezidenti Partidu CNRT hodi lidera Governu sai hanesan Primeiru Ministru ne’e ninia mandatu tinan lima.

“Maibé fila fali desizoens privadu ninia”, Natalino fundamenta.Info : Jndiario

Komentario : 

• Tweet

Judul: Posibilidade Boot PM Xanana Larezigna-an
Rating: 100% based on 99998 ratings. 5 user reviews.
Ditulis Oleh Nelson Blog 06.08

Artikel Terkait :