Governu Konsidera CPD-RDTL Ho KRM Kriminozu

Info Timor-Aktu grupu Conselho Popular Demokratika Republika Demokratika Timor Leste (CPD-RDTL) no Konsellu Revolusaun Maubere (KRM) hasoru Polisia Nasional Timor Leste (PNTL) iha Aldeia Lalulai, Suku Sagadate, Subdistritu Laga, Distritu Baucau ne’e, Governu konsidera grupo nee  kriminozu, tanba kontra ona forsa seguransa Estadu.

Sekretariu Estadu Seguransa (SES) Francisco Guterres hasai deklarasaun ne’e ba Jornalista sira, Tersa (11/3) iha Palácio Governu, hafoin enkontru Konsellu Ministru.

Francisco Guterres dehan, hahalok grupu rua ne’e, hahalok krime, tanba bainhira PNTL hala’o nia kna’ar hodi kumpri rezulusaun Parlamentu Nasionál (PN) nian ho hanoin di’ak, maibé grupu rua ne’e kontra ona seguransa Estadu.

“Sé mak asalta no kontra ona polisia, ne’e krime, tanba ne’e ita tenki buka tuir atu kaer hotu grupu ne’ebé mak involve iha asaltu Laga, ne’e krime. Tanba sira tama ona iha grupu asosiasaun kriminozu. Ida ne’e hakarak ka lakohi, tenki responsabiliza ba tribunál,” Francisco Guterres akresenta.

Operasaun PNTL nian ne’ebé hala’o iha Aldeia Lalulai, Suku Sagadate, Subdistritu Laga ne’e rezulta membru PNTL ida hetan kanek todan, no ida hetan kanek kaman ou ain rua mak maten tanba soke husi radiasaun ka ondas bomba marotok ne’ebé mak grupu KRM ne’e soe ba polisia, ne’ebé mak hakarak atu hatún grupu KRM no CPD-RDTL nia bandeira husi rin. No iha atuasaun polisia ne’e, polisia konsege kaptura membrus KRM no CPD-RDTL nian na’in rua ne’ebé kompleta ho armas hanesan rama ambon, katana, tuidk no rama hana.

Ho ida ne’e Francisco Guterres haklaken katak, konaba atu kaptura matenek balun ne’ebé involve iha grupu KRM no CPD-RDTL ne’e, nia labele koalia sai lai, tanba sei iha prosesu investigasaun ba membru grupu rua ne’ebé polisia kaptura iha operasaun baze KRM no CPD-RDTL iha Laga.

“Ita hein ba mandadu ne’ebé mak aban bainrua Tribunál atu hasai ne’e, tanba horseik PNTL konsege kaptura na’in rua, kuandu ba halo reasaun hasoru PNTL iha Lalulai. Agora ami dezenvolve investigasaun, ho investigasaun ne’e, mak ita foin hatene, sé-sé mak iha kotuk, ne’ebé mak halo asaun ne’e, para ami husu Prokurador atu hasai mandadu de kapturasaun ba sira ne’ebé deit mak involve iha asaun ida ne’e,”dehan Francisco Guterres.

Tuir Francisco Guterres, bainhira investigasaun ne’e la’o hotu tiha ona, no Tribunál hasai ona nia mandadu kapturasaun, hakarak ka lakohi, PNTL tenki ezekuta hodi halo kapturasaun ba ema sé deit mak iha grupu ne’e nia kotuk.

“Tanba ida ne’e lei no orden, tenki kumpri lei no orden iha Estadu ida ne’e, no tenki tau autoridade Estadu nian ne’e iha leten”, katak Francisco Guterres.

Francisco Guterres afirma katak, situasaun iha Laga dadauk ne’e la’o hakmatek, maibé nia husu mós ba Timor-oan tomak atu kopera ho PNTL hodi halo atuasaun ba grupu ida ne’e.

“Ita atu hatur interese Estadu ida ne’e aas liu, ita atu hatur lei no orden, atu nune’e servi ita nia povu ida ne’e,” Francisco Guterres hateten.

Francisco Guterres deklara katak, sasan sira ne’ebé grupu KRM no CPD-RDTL sira uza hodi halo atekes ba polisia, oras ne’e dadauk polisia halo investigasaun no hatene hotu ona.

“Buat sira ne’e iha hotu ona iha prosesu investigasaun, agora dadauk mós polisia investiga hela ema na’in rua ne’e, iha ona evidénsia balun ne’ebé ha’u seidauk bele koalia sai, tanba ha’u labele adianta liu prosesu investigasaun Tribunál, maibé ha’u dehan katak, ema na’in rua ne’e iha prosesu investigasaun mak sei hatudu buat barak, depois mak ita liu husi Prokuradoria hato’o ba Tribunál atu bele desidi katak, grupu ida ne’e uza saida hodi halo atakes ba PNTL,” Francisco Guterres deklara.

Maibé Francisco Guterres dehan katak, prosesu operasaun ba membrus KRM no CPD-RDTL ne’e kontinua la’o.

“Prosesu operasaun ne’e ita la’o nafatin, ita apela nafatin ba grupu hot-hotu, grupu ne’ebé mak ita dehan CPD-RDTL ho KRM, atu kopera ho justisa, para bele ita la’o ho di’ak, para nafatin ita kria hakmatek iha ita nia rai,”haklaken Francisco Guterres.

Estrada Laga-Baguia Kontinua Taka

Movimentu transportes dirasaun Subdistritu Laga no Baguia, Distritu Baucau, kontinua paradu totál, tanba  grupu Konsellu Revolusaun Maubere (KRM) no Conselho Popular Democratica República Democratica de Timor Leste (CPD-RDTL), tesi tun tiha aihun boot sira iha estrada ninin hodi taka estrada públiku.

Aktu taka estrada ligasaun Laga-Baguia ne;e akontese desde Segunda to’o Tersa feira ne’e, (10-11/3/2014), wainhira iha operasaun Polisia Nasionál Timor Leste (PNTL) hasoru grupu Konsellu Revolusaun Maubere (KRM) no Conselho Popular Democratica República Democratica de Timor Leste (CPD-RDTL), iha Aldeia Lalulai, Suku Sagadate, Subdistritu Laga, Distritu Baucau.

“Administradór subdistritu Baguia informa mai ha’u katak, husi parte Lavateri ninia sira komesa taka fila fali dalan iha área Samalari nian, sira koa has, kulu no mós aihun boot sira, ne’ebé mak ohin dader sira tesi hodi taka dalan, iha área Samalari no área Saelari nian”, informa Komandante Polisia Distritu  Baucau, Superintendenti Xefi, José Neto Mook ba Jornal Nacional Diário, Tersa, (11/3) iha Kuartel PNTL Baucau, Vila Nova.

José Neto hateten katak, alénde área Lavateri, subdistritu Baguia, dalan iha área Saelari no Samalari Subdistritu Laga mós, komesa taka fali ona husi grupu CPD-RDTL no grupu  KRM.

Komandante PNTL ne’e haktuir katak, movimentu transporte husi Baguia mai Baucau to’o agora seidauk la’o tanba dalan taka.

“Entaun fó impaktu bo’ot ba sira ho ida ne’e mak ohin ita fó apoiu ba forsa sira atu bele mai asegura seguransa área Samalari nian, tanba ne’e ita nia forsa sira sei ba haree fatin atu hela ba”, tenik nia.

Iha fatin ketak, Administradór Diritu Baucau, António A. Guterres hateten katak, situasaun ne’ebé ligadu ho operasaun husi Polisia Nasional Timor Leste (PNTL) ne’ebé mak halo iha Lalulai no oras ne’e dalan kontinua taka i kuantidade Polisia atu halo seguransa ne’e, seidauk to’o atu asegura situasaun ne’e to’o iha fatin sira ne’e.

Entretantu Xefi Suku Samalari, João de Deus Xavier hateten katak, iha informasaun pasajeirus husi Baguia nian dehan katak, movimentu transportes labele liu ba Baguia, tanba ai-hun bobo’ot sira besik estrada sira tesi hotu hodi taka estrada to’o agora mós sira kontinua halo kontrola ba fatin entre Samalari no Saelari

Entretantu pasajeirus Erminia Ximenes hateten katak, komesa horseik kedas kareta ba Baguia lahalai to’o agora, tanba impaktu husi operasaun ne’ebé mak halo iha área Lalulai nian, nia sente triste tebes tanba nia husi Baguia mai bazar iha Baucau atu ba fali Baguia, maibé kareta labele liu, nune’e nia labele fila ba nia uma.

Nia haktuir tan katak, kalan rua ona nia toba deit iha terminal Baucau inklui mós pasajeirus seluk tanba sira labele ba Baguia.

Komentario : 

• Tweet

Judul: Governu Konsidera CPD-RDTL Ho KRM Kriminozu
Rating: 100% based on 99998 ratings. 5 user reviews.
Ditulis Oleh Nelson Blog 03.03

Artikel Terkait :