Info Timor-Eis Brigada Negera-BN/Brigada
Transformasaun Sidadania (BRITAS), halo deklarasaun polítika hodi fó
presaun ba eis Komandante Brigada Vermelha, Paulino Gama ‘Mauk Moruk’,
ne’ebé lidera Konsellu Revolusaun Maubere no organizasaun Conselho
Popular Democrática República Democratica de Timor Leste (CPD-RDTL),
tenki hakruuk ba desizaun estadu.
Alénde ne’e grupu rua ne’e, Eis Brigada
Negra/Brigada Transformasaun Sidadania mós husu ba órgaun soberanu sira
estadu nian, hanesan Ministériu Públiku (MP), FALINTIL-FDTL no PNTL,
tenke hakruuk no respeita desizaun Estadu. Tanba sai ona
responsabilidade sidadaun hotu-hotu nian ne’ebé mak moris iha país ida
ne’e.
“Nu’udar responsabilidade ita hotu-hotu
nian atu kumpri hodi hatudu ita nia lealdade ba Estadu no Povu Timor
Leste (TL) ne’ebé hakarak moris hakmatek iha dame nia laran”, deklara
Sekretáriu Ezekutivu BN/BRITAS Nelson ‘Maotula’ Correia, liu husi
konferensia imprensa iha Kulu-Hun, Domingo (09/03/2014).
Tanba dehan Nelson Maotula, BN/BRITAS
konsidera katak konstituisaun RDTL nu’udar lei inan, ne’ebé mak
instrumentu hotu-hotu estadu nian, hanesan órgaun soberania estadu sira
hotu, Ministériu Públiku, F-FDTL, PNTL organizasaun rezisténsia ne’ebé
deit no mós sidadaun tomak presiza atu tane-aas no garante katak laiha
fatin ba hahalok ida ne’ebé mak kontraria ho konstituisaun.
Nelson Maotula hatutan katak, F-FDTL,
PNTL hamutuk kombatentes juventudi no povu TL tomak asume
responsabilidade aas ho imperativu atu garante soberania no objetivu
estadu ne’ebé konsagra iha Konstituisaun.
“Konsidera katak sidadaun hotu-hotu
Timor Leste nian asume dever no responsabilidade atu kumpri lei no
konstituisaun ne’ebé vigora iha Timor Leste”, Nelson Maotula afirma.
Nelson Maotula afirma katak, aktus
ne’ebé kontraria ho submisaun ba rezolusaun estadu hatudu katak laiha
sentidu estadu no labele halo reinterpretasaun ba rezolusaun ne’ebé mak
Parlamentu aprova ho votus unanimidade.
“Soberania Estadu nu’udar prinsípiu
universál no artikula podér de desizaun órgaun soberanu Timor Leste,
nune’e BN/BRITAS husu ba Prokurador Jerál atu implementa rezolusaun
ne’ebé órgaun soberanu estadu hasai”, Nelson Maotula deklara.
Nelson Maotula mós hodi BN/BRITAS nia
naran solisita ba Prezidenti Repúblika Taur Matan Ruak, atu foti
pozisaun firme klaru no Konstitusionál atu solusiona problema antigu iha
Komandu Superior da Luta nian.
“Husu ba kamaradas Kombatentes da Luta
iha CPD-RDTL atu kumpri voluntáriamente ho boa fé entrega asesores
militar hanesan aktu honradu husi sentidu estadu ho eskolta
independensia nasionál Timor Leste (TL) to’o rohan”, tenik nia.
Nelson Maotula haklean liu tan katak,
husu ba solidarisdade tomak atu fiar nafatin ba Estadu TL no órgaun
seguransa sira no keta arasta ho ajitasaun sira ne’ebé mak mosu.
“BN/BRITAS husu ba parte hotu-hotu atu
prontu, sakrifika-an ba soberania paz no estabilidade Timor Leste nian”,
deklara Nelson Maotula.
PN Husu Diálogu
Husi sorin seluk, Prezidenti Parlamentu
Nasional (PN) Vicente da Silva Guterres husu ba grupu Konsellu
Revolusaun Maubere (KRM) ne’ebé lidera husi eis Komandante Brigada
Vermelha, Paulino Gama ‘Mauk Moruk’ ho grupu Conselho Popular Defesa
Repúblika Demokratika Timor Leste (CPD-RDTL) ne’ebé lidera husi António
Aitahan Matak atu halo diálogu ho Estadu no Governu hodi hamutuk lori
nasaun no rai Timor Leste (TL) ne’e ba di’ak.
Alénde ne’e Vicente Guterres mós husu ba
populasaun sira atu mantein seriedade, kalma no kolabora ho autoridades
atu bele garante dignidade estadu ninia iha públiku.
Reprezentante povu ne’e hatutan katak,
ema hotu hakarak moris livre, hotu-hotu hakarak la’o livre ba mai
hanesan hala’o vizita ba ida-idak nia familia iha aldeias, sukus, sub
distritu no distritu.
“Ha’u apela ba maun alin sira ne’ebé mak
involve-an iha grupu Ilegál sira ne’e la’os dalan ne’ebé di’ak, maibé
dalan mak bele halo diálogu hodi bele hamutuk lori rai no nasaun ne’e ba
diak iha future”, hateten Vicente Guterres iha plenária Parlamentu
Nasionál (PN) Tersa (11/03) .
Iha fatin hanesan deputadu Manuel Castro
esplika katak, rezolusaun ne’ebé Parlamentu Nasional (PN) aprova ne’e
atu ba halo pendekatan (aprosimasaun, red) ba sira hodi bele halo
negosiasaun ho sira oinsa atu esplika rezulusaun ne’e ba sira no
preokupasaun estadu tomak nian konaba hahalok ne’ebé sira halo.
“Ha’u sente triste hodi husu bo’ot ba
sira atu rona malu hodi nune’e labele rezolve ho fakar ran, tanba fakar
ran ne’e barak ona, ne’ebé ita nia ulun sira iha diferensia ideia ne’e
normál, maibé tenki presiza halo diálogu ne’ebé ha’u husu ba Sr. Mauk
Moruk, Aitahan Matak no sira seluk tan bo’ot ho bo’ot mak bainhira han
malu, sempre povu mak sai terus ne’e mak sira iha ne’ebá dehan
di’ak-di’ak, maibé ikus mai ne’e nia konsikuensia ne’e sira la hatene”,
deputadu husi bankada FRETILIN ne’e hateten.
Manuel Castro mós dehan, tuir loloos
implementasaun rezolusaun ne’e tenki hahú uluk husi leten mak ba kraik,
para labele iha impaktu ne’ebé boot liu.
“Ha’u sente ladun di’ak ne’ebé sé bele
karik ha’u husu ba Ministru Defeza Seguransa atu haree didi’ak ba
situasaun sira ne’e, hodi nune’e povu labele fakar ran, tanba diferensia
ideia ne’e entre Xanana ho Mauk Moruk mas agora tenki involve ema barak
mak mate, tanba ne’e mak rezulusaun ne’ebé PN fó sai atu ba halo
pendekatan ba sira oinsa sira esklarese ba povu liu-liu ba sira ne’ebé
mak tuir organizaaun sira ne’e hotu no bele koopera ho setór defeza atu
bele hakalma situasaun ne’e”, Manuel Castro hateten.
Manuel Castro mós lamenta katak,
deklarasaun ne’ebé Prezidenti Parlamentu Nasional (PN) bele koalia,
maibé rezolusaun ne’ebé PN aprova ne’e hotu-hotu tenki asume
responsabilidade tanba hotu-hotu aprova.
“Labele to’o ikus ne’e dehan katak ha’u la aprova ne’e ladi’ak”, deputadu Manuel Castro haklaken.
Maske nune’e maibé Manuel Castro husu ba Mauk Moruk ho Aitahan Matak, sé bele karik aprosima liu husi dalan justisa no diálogu.
“Ne’e di’ak liutan atu nune’e labele
sakrifika povu. Tanba povu ne’e terus beibeik ona. Tanba ne’e mak
rezolusaun ne’e ba halo sosializasaun no pendekatan esplika ba sira
konaba sira nia atuasaun no movimentasaun durante ne’e iha Timor laran
tomak”, hateten deputadu bankada FRETILIN ne’e.
Representante povu ne’e hateten tan,
bainhira ida ne’e mak kontra ona buat ruma hanesan akontese hori bainrua
ne’e sira tenki hanoin didi’ak, maske akontese tiha ona ne’e
konsikuensia ne’ebé mak iha, maibé ne’e labele akontese fali ona,
bainhira sira tama ona ba segundu faze, bo’ot sira fase liman ki’ik sira
mak sai vítima fali.
Deputadu ne’e mós haklaken katak, molok
parlamentu atu hala’o segundu faze rezolusaun, husu ba Primeiru
Ministru, sé bele Primeiru Ministru (PM) nu’udar mós Ministru Defeza no
Seguransa halo kordenasaun no hanoin didi’ak lai atu labele mosu tan
problema.
“Ha’u husu ba lideransa sira liu-liu ba
Xefi Governu Xanana atu rezulusaun ne’e, maibé atu aplika ne’e tenki
haree no estuda kondisaun hodi nune’e labele fó konsikuensia pozitivu ba
povu.
Primeiru rezolusaun ne’e ba atu halo
aprosimasaun ba sira atu sira bele entregra farda no ekipamentus balun
ne’ebé mak sira kaer, maibé iha segundu sira ba halo sosializasaun maibé
ida ne’e mak larezolve ne’ebé rezulta iha ona intimidasaun no krime
nune’e iha segundu mandate ne’e tenki kaptura”, katak Manuel Castro.
Hafoin Parlamentu Nasional (PN) ho
Governu aprova rezolusaun artigu No 14/III (2o) ne’ebé ho objetivu atu
fó dalan ba Polisia Nasional Timor Leste (PNTL) ho Falintil Forsa Defeza
Timor Leste (F-FDTL) atu ba halo aprosimasaun (pendekatan) hodi esplika
rezulusaun ne’e ba grupu Konselho Revolusaun Maubere (KRM) ho Conselho
Popular Demokratiku (CPD) atu rekoella farda pra militar ho ekipamentus
balun ne’ebé mak sira uza hodi hala’o aktividades pra militar, maibé iha
operasaun ne’e membrus grupu KRM no CPD-RDTL simu ho forsa hasoru PNTL.Jndiario
Komentario :
Judul: Mauk Moruk No CPD-RDTL Tenki Hakruuk Ba Desizaun Estadu
Rating: 100% based on 99998 ratings. 5 user reviews.
Ditulis Oleh 02.59
Rating: 100% based on 99998 ratings. 5 user reviews.
Ditulis Oleh 02.59
